EUTERPE_adn, acrónimo que fai referencia á «musa da música» e a xenética, busca abordar retos comúns enfrontados pola poboación envellecida en Galicia e o Norte de Portugal, como a despoboación e a exclusión social. Ao aproveitar o poder terapéutico da música, o proxecto ten como obxectivo mellorar o benestar e a calidade de vida de persoas con demencia/Alzheimer, dano cerebral e adultos maiores.

EUTERPE_adn (www.euterpe-adn.com) contribuirá a mellorar o benestar e a calidade de vida de persoas con demencia/Alzheimer, dano cerebral e adultos maiores, promovendo a música como actividade para un envellecemento saudable, que combata a soidade e a morbilidade que esta supón a través dunha actividade colectiva prolongada. EUTERPE_adn bebe das fontes do proxecto global SENSOGENOMICS en investigación biomédica (www.sensogenomics.com), liderado polos grupos de investigación Xenética de Poboacións en Biomedicina (GenPoB; www.genpob.eu) e Investigación en xenética, vacinas e enfermidades infecciosas (GenViP; www.genvip.eu) do Instituto de Investigación Sanitaria (IDIS — Galicia; www.idisantiago.es).

EUTERPE_adn é un proxecto de cooperación transfronteiriza entre oito socios, catro en Galicia e catro no Norte de Portugal. Grazas á contribución da Facultade de Psicoloxía da Universidade do Minho (Portugal) abordarase o impacto da música na saúde dende unha perspectiva multidisciplinar que combina o estudo da expresión xenética e outras variables moleculares, combinado coa neuro-psicoloxía e a psico-fisioloxía.

Para iso, vanse levar a cabo talleres de música durante un curso completo, con músicos profesionais e con experiencia en atención á diversidade, da Cooperativa de Músicos ao Vivo e a Casa da Música de Oporto. A intervención musical estará baseada na escoita de diferentes tipos de música, a investigación das músicas da súa vida, o canto a través dun coro, a improvisación musical ou facer música en grupo. Un obxectivo que persegue este proxecto de investigación lonxitudinal é poder estudar os beneficios de diferentes actividades musicais a diferentes niveis biomédicos. Para iso, realizaranse 5 avaliacións, a primeira xa neste próximo mes de xuño, para estudar o impacto da música na saúde e o benestar das persoas. O grupo de investigación neuropsicolóxica da Universidade do Minho realiza unha avaliación do deterioro cognitivo, psicomotor, a comunicación, a calidade de vida ou o benestar emocional, entre outros, antes de que comece a intervención musical e noutros catro momentos durante o próximo curso escolar. Do mesmo xeito, os impulsores deste proxecto, o equipo Sensogenoma do IDIS, liderado por Federico Martinón, Antonio Salas e Laura Navarro, levan a cabo a recollida de mostras biolóxicas (de sangue e saliva) para realizar un estudo do impacto da música a través da expresión dos xenes.

Tras o éxito acadado nas edicións anteriores dos concertos experimentais Sensogenoma, interpretados pola Real Filharmonía de Galicia no Auditorio de Galicia; agora, EUTERPE_adn, supón o primeiro estudo lonxitudinal, no que os participantes van asistir a 60 sesións musicais, marcando un antes e un despois na investigación da música como terapia non farmacolóxica.

Este proxecto nace con vocación social e para a saúde. Implementará a música en lugares onde non adoita haber, programando a realización de talleres participativos en centros de maiores con programas de envellecemento activo, así como en centros de día e residencias para persoas con Alzheimer e dano cerebral. Profesionais da música, artistas e músicos en activo de recoñecida experiencia van dirixir talleres de música temáticos durante un curso escolar, a razón de 2 sesións á semana (1 hora cada sesión), trasladándose aos centros correspondentes.