EUTERPE_adn (‘musa da música’) ten como obxectivo principal estudar o estímulo musical no contexto terapéutico das enfermidades neuropsicomotoras e o envellecemento, usando para iso unha aproximación na fronteira do coñecemento baseada na evidencia científica. A proposta transfronteiriza nace da identificación dunha problemática común en Galicia e o Norte de Portugal, territorios afectados pola despoboación, con exclusión social e falta de oportunidades dos adultos maiores e persoas con determinadas patoloxías.

EUTERPE_adn contribuirá a mellorar o benestar e a calidade de vida de persoas con demencia/Alzheimer, dano cerebral e adultos maiores, promovendo a música como actividade para un envellecemento saudable, que combata a soidade e a morbilidade que esta supón a través dunha actividade colectiva prolongada. Para iso, a Fundación Instituto de Investigación Sanitaria (FIDIS — Galicia) nútrese da súa experiencia previa no proxecto Sensogenomics (sensogenomics.com) e o seu know how en investigación biomédica, e en colaboración coa Universidade do Minho (UMiño — Portugal) propoñen abordar o impacto da música na saúde dende unha perspectiva multidisciplinar que auna o estudo da expresión xenética, combinado coa neuro-psicoloxía e a psicofisioloxía.

Ao proxecto incorpóranse entidades de recoñecido prestixio no ámbito musical e asociacións de pacientes/usuarios beneficiarias da intervención musical. A Casa da Música (Oporto) e a Asociación Músicos ao Vivo (Galicia) liderarán a intervención musical. As asociacións Dano Cerebral Santiago de Compostela, AGADEA (Asociación Galega de Axuda aos Enfermos con Demencias tipo Alzheimer), a Asociación de Alzheimer de Portugal e a Santa Casa da Misericordia de Oporto representan as entidades beneficiarias.

EUTERPE_adn promove unha actividade socializadora que xerará un coñecemento con impacto social focalizado cara á medicina personalizada. Esta cooperación transfronteiriza engade unha novidosa dimensión da música como terapia non farmacolóxica (non invasiva), en liña coas novas vangardas en investigación biomédica no tratamento destas enfermidades. A maior fortaleza de EUTERPE_adn é a innovación e a interdisciplinariedade: será a primeira vez que a xenómica e a neuro-psicoloxía se unan para tratar un problema social. Un proxecto único e singular, pioneiro e valente.